Район Башкарма комитеты җитәкчесе Егор Тарнавский янгын куркынычсызлыгы буенча профилактик эшне көчәйтергә кушты
124 нче янгын-коткару часте начальнигы Айдар Канафин «Эшлекле сишәмбе» дә янгын турында хәбәр итте. 2025 елның беренче алты аенда район территориясендә 17 янгын булган.
Район Башкарма комитеты җитәкчесе Егор Тарнавский профилактика эшен көчәйтергә кушты. Халыкның аеруча зәгыйфь төркемнәренә: күп балалы гаиләләргә, пенсионерларга һәм ялгыз яшәүче гражданнарга аерым игътибар бирергә кирәк. Аларга көнкүрештә янгын куркынычсызлыгы кагыйдәләре буенча өстәмә аңлату эшләре кирәк.
Ул шулай ук торак пунктларда янгынга каршы тышкы су белән тәэмин итү чыганакларын тикшерүне һәм тикшерү нәтиҗәләре буенча хисап тапшыруны йөкләде.
Моннан тыш, Тарнавский районның барлык учреждениеләрендә һәм оешмаларында эвакуация буенча даими тренировкалар оештырырга кирәклеген билгеләп үтте. "Янгын чыккан очракта коллективлар паникадан саклану һәм куркынычларны киметү өчен ничек эшләргә кирәклеген төгәл белергә тиеш", - дип ассызыклады Башкарма комитет җитәкчесе.
ТР Дәүләт алкоголь инспекциясенең Чистай территориаль бүлеге белгече Наталья Димитриева алкоголь әйләнеше буенча мәгълүмат бирде. Ярты ел эчендә җан башына алкоголь продукциясен сату күләме 6,2 литр тәшкил иткән. Контроль чаралар барышында 23 кисәтү игълан ителде һәм 15 мең сум күләмендә штраф салынды.
Егор Тарнавский контрафакт алкоголь продукциясен һәм яраклылык срогы чыккан алкогольне ачыклау буенча эшне дәвам итәргә кушты. Шулай ук Башкарма комитет җитәкчесе алкогольнең тышкы рекламасын урнаштыру өлкәсендә хокук бозуларны кисәтү буенча эшнең җитәрлек булмавын билгеләп үтте.