Яңа Чишмә районында “Мәктәпкә җыенырга булыш” акциясе старт алды

Уку елы алдыннан  аз керемле һәм күп балалы гаиләләргә ярдәм йөзеннән оештырылучы “Мәктәпкә җыенырга булыш” акциясе үткәрү матур традициягә әйләнде.

 2017-2018 уку елында Яңа Чишмә районында 137 бала беренче сыйныфка укырга барачак.. Мәгълүматлар буенча, 50 беренче сыйныфка баручы бала ярдәмгә мохтаҗ.

Бу  акция кысаларында 2-11 сыйныф укучыларына да ярдәм оештырыла, мондый балалар 162. Алар аз керемле һәм күп балалы гаиләләрдә тәрбияләнүчеләр.  Беренче сыйныфка баручы укучы сумкасын тутыру традицион формада кала:  канцтоварлар, дәфтәрләр, хезмәт дәресе өчен кирәк-яраклар, 2-11 класслар өчен — мәктәп һәм спорт киемнәре комплекты.

Ярдәм сорап 18 оешмага хатлар җибәрдек инде. Болар: ЗАО «Троицкнефть», «Милосердие» ярдәм фонды, ОАО «Алексеевскдорстрой», АО «Татнефтепром», ОАО «Татнефтепром-Зюзеевнефть» һ.б. 

Ел саен бу акциягә  бизнесменнар, район оешмалары һәм гади  гражданнар да кушыла.

Акция нәтиҗәләре августның икенче өлешендә билгеле булачак.

“Яңа Чишмә хәбәрләре” газетасы сайтыннан